Sa Araw ng Kadayawan: Magsaya't Magdiwang

             Bago ang lahat, saan nga ba nanggaling ang salitang Kadayawan? Ito ay nagmula sa salitang “madayaw” na nangangahulugang mabuti, mahalaga, superyor, at maganda. Ang pagdiriwang na ito ay nakapaligid sa pagdiriwang ng buhay at pasasalamat sa handog ng kalikasan, kayamanan ng kultura, masaganang ani, at tahimik na pamumuhay. Ang pista ng Kadayawan ay isang linggong selebrasyon na ipinagdiriwang tuwing ikatlong linggo ng Agosto sa lungsod ng Davao.

                TEN TRIBES, ONE VIBE! Ito ang temang naglalarawan sa magkasundong kaugnayan ng iba’t ibang mamamayan sa lungsod ng Davao kasabay ng pagdiriwang ng ika-27 na Kadayawan Festival sa naturang lungsod. Kaalinsunod sa tema, ninanais ng pyesta sa taong ito na ipakita ang iba’t ibang kulay, kaisahan, at mayayamang kulturang ng sampung tribong naninirahan sa lungsod ng Davao: ang Tausug, Matigsalog, Obu Manuvu, Maguindanaon, Bagobo Tagabawa, Sama, Bagobo Klata, Maranao, Ata and Kagan.

Jean K. Ali, Hiyas sa Kadayawan 2012

               
           Ipinagdiwang ang Kadayawan Festival sa iba’t ibang anyo’t paraan. Isa na rito ang Hiyas sa Kadayawan. Ito ay isang labanan ng kagandahan, talino, at talento ng sampung kalahok galing sa magkaibang tribo na huhusgahan batay sa kanilang kaalaman sa kanilang sariling tribo, personal na karakter at pagganap sa cultural skill showcase. Noong ika-17 ng Agosto, 2012 sa Davao City Recreation Center, hinirang ang nagngangalang Jean K. Ali, isang 18 walong taong gulang na isang Maguindanaon bilang Hiyas sa Kadayawan.  

(c) Sheila Degamo

    
       Ang isa ring kasabik-sabik na kaganapan sa panahon ng Kadayawan ay ang Indak-Indak sa Kadalanan. Ito ay isang kumpetisyong street dancing na iniha-highlight ang iba’t ibang kultura ng mga katutubo sa pamamaraan ng sayawan at musika. Naging kampyon sa pagdiriwang na ito ang Jesus Soriano High School of Davao’s Catalunan Grande at Bambad National High School ng Isulan, Sultan Kudarat. Bawat grupo ay nanalo ng tig-kalahating milyong piso.

KAMPYON ng Pamulak sa Kadayawan 2012

                Huwag na huwag din nating kalimutan ang napaka-engrande at napakamakulay na Pamulak sa Kadalanan o Floral Float Parade na ipinapakita ang masaganang halaman sa lungsod ng Davao. Ipinakilala noong 1995, ito ay isang kumpetisyon na nagtatampok sa iba’t ibang floats na punung-puno ng orchids, bulaklak, prutas, at gulay. Sa taong ito, inihati ang parada sa tatlong kategorya: non-motorized, at malalaki’t maliit na floats.  Para sa kategorya ng malalaking floats, nanalo ang Kisan Lu Lands, Inc. dala-dala ang kalahating milyong piso.

                Nabanggit ko man ang iilan sa premyong natanggap ng nagsipanglahok, iba pa rin ang gusto kong bigyang-diin. Tila napaka-swerte’t mapalad ang Lungsod ng Davao sa pagkakaroon ng masaganang ani ng bulaklak, prutas, at iba pang ani pati na rin ang  kayamanan ng kultura.  Kaya marapat lamang na maghandog ng masigabong pasasalamat para sa kayamanan at magkakaibang kultural at makasaysayang pamanang naiwan para sa lungsod.

Kaya naman, tayo’y magsaya’t magdiwang!